1950年代原創歌曲拾遺：《生意興隆》

 

　　香港樂迷對「原創」二字頗膜拜，而又認為許冠傑出現之前的香港流行樂壇是「零原創」！其實「原創」都不過是平常事，七十年代有，六十年代有，五十年代都有，只是五、六十年代的歌者沒有許冠傑的光環，製作條件又欠佳，管你是怎樣原創，都聽不進「耳角高」的人的耳裡的。

 

　　今天拾遺出來的《生意興隆》，讓我聯想到許冠傑的《佛跳牆》。《佛跳牆》有多意思，《生意興隆》便有多意思，而有時覺得，《生意興隆》比《佛跳牆》有意思些。

 

　　《生意興隆》由朱老丁（亦即朱頂鶴，當年唱、作、奏俱能的猛人）包辦詞曲。內容說的是一對窮夫妻開檔賣白粥油炸鬼及白糖煎堆仔等等小吃，「營業」時不斷唱生晒，祈求有助招徠。在五十年代寫《生意興隆》而只寫賣平民小吃的「生意」，甚是正常，那時窮人多，大多都只能做小販，家母就常憶及當年在街頭賣過幾年粥！那時的粵語歌面對的是草根階層，寫這些才易讓他們共鳴。

 

　　相信，這首「低俗」之作其實也保存了一點民俗風情，像「食過油炸鬼會一世好夫妻」（但也有人稱油炸鬼為「油炸（秦）檜」，語境很不一樣吶）又或「煎堆軟曳，金銀滿櫃」等百姓心思，今天的香港人恐怕都不知道了。

 

 

 

生意興隆

曲詞：朱老丁（頂鶴）　合唱：朱老丁、馮玉玲

 

                （男）明火白粥油炸鬼（女）明火白粥油炸鬼

                （男）莫論賤貴迎合經濟問題

                （女）一毛兩味真正扺

                （男）真正扺（女）買呢你就嚟

                                （白）    （男）吁吔，啲油炸鬼擔挑咁大條呀

                                                （女）你睇啲白粥　好似牛奶咁靚架

                （男）明火白粥油炸鬼（女）明火白粥油炸鬼

                （男）唔貴　行嚟睇一睇　真架勢　又好睇（女）又好睇

                （男）人話恩愛兩夫妻　好似一孖油炸鬼

                （女）係唔係呀喂

                （男）確係確係的確係　你食過油炸鬼會一世好夫妻

                （合）買啦大姑　買啦大姐仔（大笑）

                                （白）    （男）喂　大姐食過嫁一個靚老公仔呀

                                                （女）後生仔食過娶番個靚老婆仔

                （男）白糖煎堆仔（女）白糖煎堆仔

                （男）特別妙製材料好嘢用齊

                　　　周年客仔都讚扺都讚扺

                （合）買啦你就嚟

                                （白）    （男）喂朋友　買就好買咯噃　唔買就冇嘅咯噃

                                                （女）買就趁手　千祈唔好走雞

                （男）白糖煎堆仔（女）白糖煎堆仔

                （男）全市聞名好東西　真架勢　又名貴（女）又名貴

                （男）最好意頭煎堆仔

                　　　煎堆碌碌　金銀滿屋

                （女）係唔係呀喂

                （男）確係確係的確係

                　　　煎堆軟曳　金銀滿櫃

                （女）係唔係呀喂

                （男）確係確係的確係

                （女）買啦先生　買啦後生仔

                                （白）    （男）哦　呀伯又買噃亞大姑又買

                                                （女）嗰個大姑話添食喎

                （男）你又買（女）佢又買

                （合）嚟啦買啦嚟啦買啦生意興隆真安慰