何大傻父女合唱的《新時代》

 

　　近日知道了何倩兒是何大傻的女兒後，不禁失笑，只緣自己以前眼見何大傻、何倩兒兩個名字並列，竟不知道二人是父女關係。比方說拙著《早期香港粵語流行曲（1950-1974）》裡的第十二章「早期粵語流行曲作品概說」，其中的「反飛歌」一節，就引錄了一首《新時代》（見該書171頁），何大傻寫詞，何大傻和何倩兒合唱的。原來，這歌竟是父女合唱，失覺太甚了。

 

　　說起來，香港的流行樂壇，難得見到父女（子）合唱，還要灌成唱片的就更罕見了。想不到在五十年代卻有這種案例。

 

　　回說何氏父女合唱的《新時代》，何大傻的詞雖然對年青人崇尚西方流行文化有點不以為然，態度是溫和的，算是那個時代的代溝的反映吧。拙著也只是把《新時代》的部份曲詞引錄，這裡且把整首歌詞都引錄出來（歌曲調寄的《四不正》是首僅有簡簡單單四個樂句的廣東小曲，以工尺譜的音符記之是：生工工生生五六─，五六工五六工尺─，尺六─反工尺上─，尺乙士尺乙士合─）：

 

 

《新時代》

詞：何大傻　唱：何大傻、何倩兒

 

（父）（小曲《四不正》）乜你一路行街都一路跳，貪快亂跑咁冇定條。

（女）咪嘈到呱呱叫嘞。

（父）呃，睇見你立刻眼眉調。

（女）跟住你行街梗要受氣ga。

（父）因你認真太過頑皮。

（女）年少，貪得意之馬，想吓你自己做細路時。

（父白）你而家大個女啦馬，重跳跳貢，冇Ｄ斯文嘅咩？

（女白）咁至叫做天真活潑吖馬，爸爸。

（父白）笑話笑話幾百個。

（女白）你唔識嘢之馬。

（父）長大要學番長大禮嘞。

（女）守禮都越加冇問題，男女，稱交際噃。

（父）喂，交際亦都要有範圍。

（女）所謂後生要丰度夠噃，爸爸咁至合得應潮流。

（父）混賬胡說真激瘦咯，你總冇Ｄ大方咁下流。

（女白）近來鞋底要夠響，食嘢鬥搶，咁至合格ga

（父白）笑話，女子應該三步不出閨門，你就兩步跳過馬路，吾不欲觀之矣。

（女）哈哈爹地你認真古老咯，應要學番吓時髦。

（父）至弊人格都不顧，點會學得咁胡塗？

（女）真係講極亞爸都唔化咯，睇吓現今咁繁華，男女歐西化ga啦，請你自己去細查。

（父白）哦，原來全世界嘅男女，都係咁丰度嘅啦。

（女白）當然啦，你唔適應潮流，就畀人笑你老鄉嘅啦。

（父）哦，風味若果改換晒，咁我就亦都要學埋。

（父女合）做人要心爽快咯，享吓幸福放情懷。

 

 

 

 

　　據筆者自己的資料顯示，何氏父女曾合唱的歌還有《大話夾好彩》、《老蚌生珠》、《久別重逢》等。都是和聲唱片公司出品的「粵語時代曲」。