這一曲：渴望（「聽聽這支笛」文選）

 

　　九十年代中期，在《香港經濟日報》主編流行音樂版的日子，曾以「竹門文」的筆名寫一個名謂「聽聽這支笛」的專欄。粵人俗語謂「唔聽佢支笛」，意即不聽某人說的話（意見），這專欄名蓋生發於此。也因此，這個小欄子的標題也多是惡搞歌名，諸如「一台有一個大典」、「一人有一個大獎」之類，而行文風格則嘗試以三及第出之。現在選了這篇貼將出來，以示也曾寫過這種風格的東西。

 

　　竹門文見到王菲隻新碟，居然會玩「缺筆」，抵受不住誘惑，買咗隻返屋企。

 

　　講起缺筆，最令竹門文印象深刻嘅一單「畸事」，就係近代有個文人叫人喺泰山某石上鐫刻咗「虫二」兩個字，冇人知係乜意思，半個世紀之後，先有另一個文人指出：「乃『風月無邊』之意」咁嘅缺筆詞句，真虧佢諗得到！難度高到冇人有呀！

 

　　再睇睇王菲呢張碟上面嘅缺筆文字，個個字都好易估，可能做設計嗰位仁兄，都好驚缺得太多筆畫搞到人哋估唔到，引出反效果！

 

　　將啲缺筆文字嘅筆畫補齊，王菲呢堆字其實係想表示：「《王菲》沒有圖案碟、沒有《流非飛》下集、沒有大頭相、沒有寫真集、沒有新形象、沒有劇場版、沒有混音版本、沒有限額發行、沒有歌迷會申請表格、沒有甚麼，只有《胡思亂想》」。

 

　　王菲的確與別不同，冇晒果啲嘢一啲都唔在乎。咁又係，真正樂迷，買唱片就係聽歌之馬，要寫真集、大頭相、歌迷會申請表格有乜用。王菲都鬼馬啦，打開本歌詞冊，白濛濛嘅，唔通仲「沒有歌詞」？原來有另紙印錄。

 

　　阿菲大姐，我竹門文有心臟病架！

 

　　不過竹門文諗諗吓，一張畀真正樂迷嘅唱片，應該「有」啲乜？

 

　　好似王菲呢張《胡思亂想》，淨係有歌詞，似乎都係爭咗啲。或者王菲覺得好似台灣某啲唱片咁每首歌都有文案、按語、感言太刻意，扼殺欣賞者嘅想像空間！但係，每首歌都附上主旋律譜都好應該吖！

 

　　竹門文年紀大，記得五十年代買中文唱片，張張都係歌詞歌譜對照架，邊似得而家孤寒到死，淨係有詞冇譜。呢十幾年，間中都有意外收穫，好似林子祥、徐小鳳、盧業瑂、成龍（但成龍嘅歌迷有幾多識睇譜？）都曾在其唱片上送過歌譜。但竹門文就唔係好明點解佢哋忽然咁好死附贈歌譜。

 

　　竹門文好希望唱片公司啲實力歌手如王菲、學友等，快快糾正長期以來「有詞冇譜」嘅不合理狀況！