龍劍飛如來神掌大戰東島長離七旋斬

 

　　呢個世界，永遠係個弱肉強食嘅世界，但係上帝為咗世界多姿多采，卻從來不會把人人都造成強者，總係有弱有強，有好欺的，有不好欺的。如果不幸被上帝指派到呢個世界上當弱者，咁點算呢？要逞強爭勝肯定鬥不過強者，唔通安份做個無名弱者乎？

 

　　《如來神掌》片集中其實有個很好的案例，足以指導我地弱者如何在列強中爭點鋒頭留點美名，若能在這個案中融會貫通，則以弱勝強未必不可能。

 

　　《如來神掌》片集中有個東島長離，鎮山之寶係絕學「七旋斬」，可惜呢套「七旋斬」響江湖上，只係二、三流武功，一邪雙飛三絕掌全部都勝過佢。

 

　　東島長離當然知道自己嘅料去到邊。但響江湖上，明知料唔夠，係弱者，都要搵方法立足，盡量讓人不覺得係弱者，不覺得冇料到。佢嘅方法係，每有大鑊嘢，佢總會到，而且總會遲到，到好過冇到。當然呢種遲到仲好過梅艷芳果種。阿梅果種係人人都知道佢到而遲到，但東島長離則係人地冇預佢會來幫手而佢會遲到來幫手！

 

　　東島長離呢種遲到，真係好絕嘅！

 

　　Ｄ後生仔同埋Ｄ前輩自恃一流武功，爭先同大魔頭比拼較量，鬥到咁上下，兩方嘅元氣都消耗不少，遲到嘅東島長離，此時當然贏盡以逸待勞嘅優勢，也贏得仗義出手救人嘅美名。雖然，東島長離每次遲到仍不免搞到一鑊泡，但人們還是喜歡他的「善行」，為他的「例遲」而津津樂道，這就是他的成功。

 

　　唔夠料就要識得避重就輕，東島長離係深深知道箇中奧妙的！有料恨不得出手早，冇料就宜遲出手，絕不能又學有料者去「出手早」者，所以江湖潮流興牙尖嘴利唔緊要，取其反面沉默木訥便可，江湖潮流興作大唔緊要，取其反面作細便可，只要拿捏準確如東島長離嘅「遲到心法」般，人地反而無從知道你嘅虛實，重特別注意你，印象深刻。

 

　　所以，未必一定要逞強爭勝，才能留名千古，擅於避重就輕，借勢而逆行，一樣可以流芳百世。